Desmontando armarios: selección de lecturas da Biblioteca do IES Afonso X O Sabio de Cambre

No encontro de bibliotecarios e temática LGTB celebrado o 30 de xuño e  do que se deu información neste blog,  contamos coa participación de Antonio Martínez do IES Afonso X de Cambre que nos falou das iniciativas levadas adiante no seu centro contra a discriminación por motivos de orientación sexual.

Agora contamos cunha nova iniciativa coordinada por este centro, o Seminario Permanente baixo o título A Comunidade educativa e a diversidade afectivo-sexual.

Con este texto de presentación o Seminario do IES quere contribuír a aportar o seu grao de area á visibilización LGTB no centro:

A diversidade afectivo-sexual, a adolescencia LGBT (Lesbianas, Gais, Bisexuais e Transexuais), necesita visibilizarse no curriculum e nos centros educativos, non quedar relegada o seu tratamento á boa vontade do profesorado formado e interesado. É necesario que A REALIDADE LGBT forme parte integral e visible do curriculum e que se trate específica e explicitamente nos diversos documentos do centro, nas diversas actividades do Instituto, etc.

Nesta liña de actuación prepararon unha Guia de Lectura e unha exposición dos fondos documentais sobre o lema Desmontando armarios.

Como los demás

Como los demás de Vicent Garenq. Os protagonistas, Emmanuel e Philippe, forman a parella perfecta, quérense e ámanse infinitamente,… ou case… A parella lévase ben ata que Emmanuel sinte o desexo de ser pai, a pesar de que a súa parella, Philippe, non quere e que ademáis non teñen dereito a adopción como parella. Un bó día, Emmanuel decide telo, custe o que custe, aínda que iso supoña que pode chegar a perder a relación que mantén con Philippe.

Comeza a buscar solucións na adopción pero a súa opción sexual vaille traer moitísimos problemas. Ao remate decide buscar a unha nai de aluger pero vai atopar con algo máis que iso, unha muller (Fina, que está ilegal no país ) que está disposta a darlle un fillo e  que se namora del. A situación vai escapándoselle das mans…

Contos da diferença: contos lésbicos

O sábado 19 de setembro ás 20.30h. vai ser apresentado esta obra no centro social A Esmorga de Ourense.

Contos da Diferença: I colectânea de contos do Tangas Lésbicas 2008,  é unha obra colectiva que recolle os contos de temática lésbica publicados en 2008 no blog Tangas Lésbicas.

A apresentación contará cona presenza de Marita Moreno Ferreira, uma das autoras da obra, e da artista galega Lucia Aldao co seu espectáculo Macedonia Pequena.

Do blog Tangas lésbicas tiramos información de que a próxima publicación dos Contos da Diferença contará coa particiación de 3 autoras galegas.

Tal como soy: unha novela gay afroamericana

Raymond, un avogado negro do sul dos Estados Unidos, loita por aceptar a súa homosexualidade e deixar atrás a invisibilidade á que estivo submetido no pasado. A súa vida pasa por un momento tan complicado como crucial: en pouco tempo deberá enfrentarse á súa familia, moi respectada e activa no mundo da política de Alabama, solucionar os problemas que lle dará un famoso e sexi deportista, cliente seu, polo que sentirá unha irresistible atración, recuperar o cariño de Nicol, grande muller e mellor artista, e superar a dolorosa pérdida do seu mellor amigo.

Tal como soy (Just as I am) (Egales, 2005)  é unha novela sobre o poder do amor coa que E. Lynn Harris conmove os corazóns dos lectores de todo o mundo.

“Harris logra entrelazar cuestions de identidade, sexualidade, raza, e clase social con desenvolvemento, convertendo Tal como soy nunha lectura interesante e de gran profundidade.”   OUT

“Tal como soy é ficción inovadora no seu mellor estilo. Harris deixou constancia de que a novela gay afroamericana ten o seu sitio no mercado literario.”    PHILADELPHIA TRIBUNE.

O autor foi no seu día executivo de vendas de IBM. Realizou un cambio brusco na sua carreira que deu como resultado en 1991 o bestseller Invisible life. En 1996 Tal como soy (1995) foi escollida novela do ano polo Blackboard African-American Bestsellers Inc.

Queer History Project

Do mundo anglosaxón procede unha iniciativa pioneira: a recuperación da memoria histórica das persoas que forman parte da comunidade lgtb.

Queer History Project é un proxecto da organización Out on Screen, de Vancouver (Canadá), que está centrada na utilización dos medios audiovisuais para difundir o coñecemento da comunidade lgtb. Son, entre outras actividade, os organizadores do festival de cinema Vancouver Queer Film Festival.

O Queer History Project é un lugar  onde poder crear, coñecer e compartir as historias persoais. Pretende crear unha colección online permanente que conserve e difunda a memoria.

Promove a produción de películas que conten experiencias queer do pasado para garantir a pervivencia da historia para as xeracións futuras. Permitirá que a nosa historia tome o seu lugar na historia do Canadá

Stonewall Book Awards

O Stonewall Book Award-Barbara Gittings de Literatura e o Stonewall Book Award-Israel Fishman de Ensaio son  escollidos entre aquelas obras de língua inglesa publicadas cada ano. O premio consistestente nunha placa comemorativa e un premio en metálico., é anunciado en xaneiro e  presentado aos autores gañadores e aos editores na conferencia anual da ALA no mes de xuño ou xullo.

As recomendacións para obras nominadas son realizadas por calquer persoa non relacionada co autor ou o editor da obra. A proposta debe ir “xustificada” cunha descrición da obra, e a razón da súa recomendación, e enviada ao comité do premio até o 31 de outubro.

A historia deste premio remóntase ao ano 1971 no que se denominaba Gay Book Award, que pasou a ser un premio oficial da ALA en 1986. Será a partir do ano 2002 que reciba o nome actual.

Desde Patience and Sarah de Isabel Miller de 1971, moitas teñen sido as obras premiadas nestes anos. Algúns destes títulos son despois traducidos a outros idiomas polo que pode ser unha boa referencia para coñecermos obras desta materia para as nosas bibliotecas. Desta mesma autora está publicado en España Un lugar para nosotras (Egales, 2000).

A historia, as condición de participación e os premios poden ser consultados na web do premio: Stonewall Book Award

Yukio Mishima: El color prohibido

Yukio Mishima, pseudónimo de Kimitake Hiraoka, é un dos escritores xaponeses máis importantes e controvertidos do Xapón do século XX. Ademais de narrativa, escribiu relatos, ensaios, literatura de viaxes e teatro Kabuki. Entre as súas obras: Confesiones de una máscara, El pabellón dorado, Madame de Sade, El rumor del oleaje, El mar de la fertilidad,…

O 25 de novembro de 1970 suicidouse mediante o método tradicional sepuku no cuartel xeral da Jieitai (Forza de Autodefensa) tras recriminar en público a perda das tradicións en favor dunha sociedade consumista e deshumanizada.

Escrita entre 1950 e 1953, El color prohibido (Alianza, 2009), era unha obra inédita en castellano. Ademáis de expresar teorías estéticas e filosóficas describe con sinceridade e audacia, o universo homosexual do Tokyo da posguerra. É a primeira novela xaponesa actual na que se fala sen enganos do “amor que non pode dicir o seu nome” naquela sociedade con tan estritos costumes.

Shunsuké, un famoso escritor sesaxenario, séntese atraído pola extraordinaria beleza dun rapaz homosexual, Yuichi. Coñeceuno por medio de Yasuko, unha rapaza da que está namorado, pero que non lle corresponde xa que se sinte atraída por Yuichi sen coñecer as súas inclinacións. Tras a aparente estabilidade emocional de Sunshuké escóndese unha vida atormentada con terribles fracasos sentimentales e altísimas cotas de misoxinia que manifesta nun diario que xamais verá a luz. El, que dedicou a súa vida á creación literaria, nun momento en que lle abondonou a inspiración, ve en Yuichi a posibilidade de se vingar das mulleres que o fixeron sofrer que o menosprezaron e o humillaron desde a súa xuventude. Pensa comezar a súa vinganza con Yasuko, pactando con Yuichi que case con ela a pesar da súa incapacidade para querela. A súa influencia, levarao a inflixir o maior sofremento posible ás mulleres que non poderán resistirse aos seus encantos. Yuichi adéntrase en aventuras homosexuais ao tempo que cumpre o seu pacto co vello escritor de seducir a varias mulleres para destozarlles o corazón. O que ignora o vello escritor é o que lle traerá este xogo tan perverso.

Resumo do encontro: A Biblioteca LGBT, curso de supervivencia para a biblioteconomia do s. XXI

O martes 30 de Xuño encontrámonos varias persoas das Bibliotecas Municipais da Coruña, do Grupo 7 Cores e deste blog para debatir sobre a necesidade da presenza dos materiais LGTB nas bibliotecas. Ao encontro sumáronse tamén representantes dalgunha das escolas da cidade e de Agabel (Asociación Galega polas Bibliotecas Escolares e a Lectura)

As xornadas organizáronse en dúas quendas, coa mesma estrutura e contido, para facilitar a participación do persoal das bibliotecas. Na quenda da mañá participamos unhas 17 persoas e na da tarde 13.

Os representantes do Grupo 7 Cores fixeron unha presentación do que significan as siglas LGTB e das persoas que forman parte destes colectivos, agrupados en moitos casos simplemente pola súa diferenza de identidade sexual frente á “normalidade” heterosexual, o que non quere dicir que se trate dun grupo uniforme nin cos mesmos obxectivos nin necesidades.

Contribuíron tamén a aclarar conceitos como identidade, sexo e xénero no que sempre se crea confusión. O debate xurdiu, a partir de aquí, sobre a necesidade da visualización das diferentes orientacións sexuais para normalizar na sociedade o que xa está recollido a nivel legal na igualdade de dereitos. Aínda habendo quen considerase que todo isto xa está “superado” e que a sociedade aceita cada vez máis esta realidade, o debate da tarde, con representantes do ensino, apoiaron a tese de que aínda se está lonxe da normalización e que queda moito camiño por percorrer.

Neste sentido Antonio Martínez de Agabel, e profesor do IES Afonso X de Cambre, explicou a iniciativa do seu centro no traballo específico contra o bullying homofóbico. A iniciativa de varios membros do profesorado comezaron este curso escolar, e continuarase no próximo, cunha campaña específica contra este tipo de acoso que se vai completar coa creación dunha sección específica de fondos LGTB na biblioteca do seu centro.

Isto dá pé a comentar xa o debate específico centrado na presenza e visibilización dos documentos LGTB nas Bibliotecas.

Non parece fácil visibilizar especificamente estes recursos xa que os centros de interese das bibliotecas son moi numerosos. Quedou claro que os fondos desta temática nas bibliotecas municipais da Coruña son bastante numerosos, sen embargo estes fondos están dispersos en diferentes seccións, o que fai moi difícil para os usuarios coñecer a súa existencia en conxunto.

Neste sentido apuntáronse varias posibilidades de visualización dos materiais sen necesidade de crear centros de interese específicos para esta materia:

• exposicións e/ou centros de interese temporais coincidindo con datas sinaladas como pode ser o 28 de xuño
• creación de guías de lectura
• recuperación fácil a través do catálogo de maneira que se poda agrupar virtualmente todos os materiais desta temática
• misturar os diferentes materiais de maneria que contribúa a difundir a “riqueza” do fondo: ensaio, música, cinema, literatura…

Incidiuse na necesidade de traballar con esta temática como una materia transversal que debe estar presente nos contidos de todas as actividade que se realicen nas bibliotecas.

Por último incidiuse na dificuldade de coñecer materiais específicos de temática LGTB de calidade, sobre todo no caso da literatura e de outras expresións artísticas como a música, o cinema, a banda deseñada… Se para o ensaio parece bastante claro coñecer o que se publica, para os outros materiais é máis difícil. Neste sentido é importante que existan recursos como este blog e grupos de traballo como o Q.doc do COBDC (Col·legi Oficial de Bibliotecaris-Documentalistes de Catalunya) para que contribúan a aportar materiais de interese para as bibliotecas como a Bibliografia sobre Cultura Gai, Lésbica I Transsexual.

A experiencia foi moi positiva e moi ben valorada polos participantes. Esperamos que este tipo de encontros se poda extender a outras bibliotecas e aos centros escolares.

Grupo da tarde

Representantes Grupo 7 Cores