A CORUÑA

Organizado por ALAS Coruña e o Grupo 7 Cores. Web oficial: Orgullo A Coruña 2011

XOVES 23

Lumeirada da visibilidade na zona dos salesianos a partir das 22h.

SABADO 25

Tranvia da visibilidade: saída das escravas ás 20h.

Concentracion “pola visibilidade lesbica” ás 21h. Na praza de María Pita

Festa: na praza de Azcárraga a partir das 22h.
Coas actuacións de:
dj manri (gay-sha ola green)
afrodita drag
maryan divine
dj*licho (backstage)

MERCORES 29

Charla de Iñigo Lamarka, activista LGTB e defensor do pobo Basco (Ararteko). No Círculo de Artesanos ás 20h.

VIGO

Organizado por: Associación Nós Mesmas

Exposición do 20 ao 24: exposición das fotografías do concurso fotográfico “A miña visión do Orgullo” na Casa da Muller

SABADO 25

De 11 a 18h participaremos nas actividades preparadas polo Centro Social Lume! no que xogaremos unha liguña de fútbol sala, haberá un xantar popular (9€) e un debate aberto sobre o movemento LGTB.

Festa Stonewall no local “La Fiesta de los Maniquíes” ás 24h.

Actuacións: DJ Almagato, xogos, regalos, e máis sorpresas!!

DOMINGO 26

De 18 a 21h. na Praza da Constitución con:

• obradoiro de títeres para cativas/os
• mesa informativa
• exposición das fotos do concurso

MARTES 28

Acto político-institucional, ás 12h. na Praza do Rei, no que celebraremos o izado da bandeira LGTB no Concello e inundaremos a Praza cunha bandeira xigante.

Marcha-manifestación Orgullo LGTB ’11 Nin un paso atrás!: saída de Urzaiz (até a Praza da Cosntitución

Documentario “Homobabyboom”: ás 20h. no Centro Cívico Casco Vello

O noso país non é moi prolífico na produción de obras desta temática, polo menos a nivel editorial, aínda que si existen textos, sobre todo en revistas, que tratan este tema. A existencia dun país pouco articulado socialmente, onde mesmo as entidades de defensa dos dereitos LGTB son poucas e febles, o mercado non presta excesiva atención ao noso público, e as propostas editoriais chegan, na maior parte dos casos, en castelán e de editoras de Madrid ou Barcelona.

Na actualidade xa existen multitude de obras infantís de calidade que poderían ser do interese das nosas editoras de referencia neste ámbito, como son Kalandraka e OQO, ou de outras que podían comezar a editar algunha colección sobre novos modelos de familias. Mentres isto non ocorre acabamos acudindo ao mercado en castelán para solventar esta falta de atención.

Para paliar en parte esta falta a Xunta enviou este ano ás bibliotecas dúas obras en galego para adultos. A primeira delas é unha da que xa temos falado no blog: Elisa e Marcela: alén dos homes.

A segunda obra é de alcance máis restrinxido xa que se trata dun catálogo de arte. A obra é Cuestión de peito de Álex Mene (A Nosa Terra, 2008), documento que fai un repaso pola obra fotográfica deste autor.

Queremos comezar esta recensión pola cita inicila da obra, moi acertada, tomada d’A verdade vestida de Blanco Amor:

A beleza, xa se sabe, é un elemento subversivo de primeira clase

O autor utiliza esta cita porque coñece ben o autor, (está preparando a súa tese sobre a obra fotográfica de Blanco Amor), como declara na entrevista realizada no Diario de Pontevedra, referente que parece dirixir o traballo deste artista.

Cuestión de peito forma parte da colección Prensa & Criación, d’A Nosa Terra, dirixida a mostrar obras de artistas. Neste caso recompila  o traballo de Álex Mene do período 1998-2008.

Como se recolle na mesma entrevista Cuestión de peito permite apreciar as constantes que presiden este traballo  (preocupación formal e técnica, certo carácter autobiográfico…), un traballo que ten un eixo temático fundamental: a homosexualidade masculina. “Sen dúbida é un tema importante na miña obra. Pero máis alá do que sería a reivindicación da homosexualidade, se eu reivindico algo é unha ollada homoerótica. Que faga fotos de homes espidos non quere dicir nin que o modelo sexa gay nin que eu estexa falando exclusivamente diso, da homosexualidade. O que é inevitable é que o fotógrafo que mira, neste caso eu pero penso que sería igual mesmo se fose unha muller, ten diante un corpo espido dun home. Así que tampouco se pode negar ese valor homoerótico. Pero teno dentro da normalidade absoluta: igual que cando retrato a un mozo e a unha moza non estou facendo reivindicación ningunha da heterosexualidade”.

Monse Cea, no texto incluído na obra, A Viaxe dun corpo aberto, sinala  que o que desconcerta na obra é asistir á representación dunha persoa a través do seu corpo nú con ausencia de morbo… Crea unha obra reivindicativa da diferenza, desde a vivencia persoal, desde a naturalidade e a normalidade. Desde unha linguaxe universal, reivindica a diferenza cultural e de xénero.

Reivindica a naturalidade do seu desexo,  avoga pola volta necesaria á fusión primixenia do ser humano coa natureza. A intimidade atópase asociada coa vivencia da natureza, do exterior, coa reivindicación do gozo sensual dunha erótica aberta, sinxela; a reivindicación dun erotismo limpo, sen morbo, normalizado.

Os outros textos que acompañan a edición: Que o centaura cabalga amazona, de Helena González e Para ollos de caracois de Mar Caldas, analisan as imaxes mostradas nesta recompilación desde unha perspectiva do discurso queer na obra de Álex Mene.

Festival Visible Cinema: I Mostra de cine de temática LGTB, do 4 ao 10 de Abril na Coruña, organizado pola ONG Visible para la cultura LGTB

O festival consta de dúas partes:

Unha primeira dirixida ao alunado dos institutos da cidade coa proxección dos documentarios sobre a diversidade sexual: Homo Baby Boom e Orgullo, seguidos de debates nos que participarán representantes de colectivos LGTB e do Servizo Municipal de Mediación en Información LGTB

A segunda parte, aberta ao público en xeral, con proxeccións de filmes, videos e documentarios en varios locais da cidade: CGAI, Teatro Rosalía, O Alfaiate e na Sala Cormelana. Indicamos estas actividades abertas ao público:

Xoves 7
18:00h Curtametraxes (CGAI)
21:30h Proxección sing-along (Karaoke) de Mamma mía (Sala Cormelana)

Venres 8
20:45h. Proxección de Tormenta de verano (CGAI)

Sábado 9
23:30 Videoclips (O Alfaiate)

Domingo 10
20:00h. Proxección de Ander (Teatro Rosalía)
Presentando por Mon Santiso coa presencia do director Roberto Castón.

En algún outro post teremos que facer algunha entrada relativa ao cinema de temática LGTB para adolescentes. Un bon exemplo é o filme Tormenta de verano que se proxectará no Festival, película que foi incluido no noso post Listado de películas LGTB.

Merece especial destaque a proxección do filme Ander de Roberto Castón, do que tampouco fixemos ningunha mención no blog xa que de momento non está disponíbel para a súa adquisición. Este filme foi premiado en varios certames de cinema polo súa maneira de nos contar unha historia de tolerancia no mundo rural dos caseríos bascos.

 O Rainbow Project é un proxecto conxunto da  Gay, Lesbian, Bisexual, and Transgendered Round Table e da Social Responsibilities Round Table da American Library Association. O Rainbow Project elabora unha bibliografia anual de libros de calidade, con contido GLTB, recomendados para as persoas até os dezoito anos de idade.

A Bibliografía está organizada en libros de imaxes (albuns), libros de ficción, e libros de non ficción (ensaio). O interesante dos títulos seleccionados é que inclúen un pequeno comentario sobre o seu contido, ademais de indicar a idade para a que é recomendada a súa leitura.

Coñecer as propostas da Rainbow Project permítenos descobrer libros que poden ser publicados proximamente en España polo que nos pode servir de adiando editorial para estarmos pendentes de novas publicacións de calidade para as nosas bibliotecas.

Por outro lado é un bo listado para influir sobre as poucas editoras que publican obras desta temática, que á parte das especialidades dirixidas á comunidade LGTB como Odisea ou Egales, pode servir de orientación para outras.

Os listados dos últimos anos poden consultarse no Blog do Rainbow Project:

• Listado 2011
• Listado 2010
• Listado 2009
• Listado 2008

Unha consulta á base de datos de libros editados indícanos algunhas das obras publicadas en España. A data de edición pode ser anterior, xa que o listado do Rainbow Project responde á data na que eles o recollen, e non á de publicación. Dalgúns autores (poucos) existen outros títulos publicados e, nalgún caso, tamén de temática LGTB, sen embargo non se indican aquí por non teren sido incluidas nos listados do Proxecto.

Seleccionados no 2008:
Tres con tango (2006)
Richardson, Justin ; Parnell, Peter
RBA Libros

Chica de casi 16 : una auténtica tortura (2008)
Limb, Sue
Anaya / Cículo de Lectores

Como yo lo veo (2008)
Davis, Will
Kailas Editorial

Gotham central, Media vida (2004) (Banda Deseñada)
Rucak, Greg ; Lark, Michael
Norma Editorial

Fun Home : una familia tragicómica (2008)
Bechdel, Alison
Mondadori

Seleccionados no 2009:
Skim (2009) (Banda Deseñada)
Tamaki, Jillian ; Tamaki, Mariko
Ediciones La Cúpula

Seleccionados no 2010:
Pink! el pingüí que es va tornar rosa (2010) (Catalán)
Rickards, Lynne
Trapella Book

Ysquare (2007) (Banda Deseñada)
Park, Judith
Planeta-De Agostini

El noi del vestit (2010) (Catalán)
Walliams, David
Estrella Polar

Seleccionados no 2011:
Yo (2010)
Martin, Ricky
Plaza & Janés

Batwoman(2010) (Banda Deseñada)
Rucka, Greg ; Williams, J. H.
Planeta-De Agostini

Nun programa cultural da televisión fixeime na nova que estaban a comentar, a presentación dun libro en Barcelona, dunha autora, Elena Moya, nacida en Tarragona, que escribiu un libro “Los olivos de Belchite” en 2010. Anotei a noticia, por intuición, e comprei a obra, en primeiro lugar por curiosidade particular e, por se podía ser de interese para o fondo documental da biblioteca na que traballo. 

A historia atrapoume desde o primeiro momento, foi un pracer poder lelo. A descrición do tempo histórico, a mistura dunha historia familiar e unha fermosa historia de amor: unha boa historia de carácter humano.

Los olivos de Belchite (Suma de letras, 2010), narra a historia  de María como nexo de unión entre a Historia (a España actual e a España da Guerra Civil plasmada en Belchite e os seus habitantes); as familias ( a súa propia e a da súa parella), entre diversas culturas (España e Reino Unido); as diferentes formas de amar (a protagonista e a súa relación con Nell; unha funcionaria do concello de Londres); a economía global actual… Unha novela que nos vai contado a Nosa Historia ao longo do tempo coas súas virtudes e as súas miserias.

A autora naceu en Tarragona, e estudou Xornalismo. Despois de realizar diversos traballos ao longo do mundo, estableceuse en Londres onde traballa como xornalista  de Economía nun gran xornal do país. Los olivos de Belchite é a súa primeira novela, que recibiu boas críticas pola prensa especializada. Hoxe segue en Londres onde vive coa súa parella.

A obra está editada na serie Singulares, textos escollidos que non chegarían aos lectores por mor das súas peculiaridades. Entre estas encóntrase a linguaxe utilizada por Abel que se trata, en palabras de Manuel Rivas,  dun “poemario verdadeiramente singular, no que a inconfundible voz de Abel Mendes fai un alegato, cheo de tenrura e de ironía, contra a intolerancia e, sobre todo, dirixido a todos e a todas os que, por causa dunha afectividade distinta, aínda hoxe, padecen agresións físicas e psicolóxicas”, segundo se recolle en Galicia Hoxe do 3 de marzo de 2007 da presentación do libro na Fundación Seoane.

Manuel Rivas sinala a valentía persoal e a calidade literaria da obra de Mendes. O autor, nacido en Berna no ano 1975, ten colaborado en libros colectivos e revistas de poesía e recibiu o Premio Parroquial de San Xurxo “Marcela e Elisa”

O libro está dedicado “aos que no ensino primario e secundario, por causa da súa afectividade, padeceron ou padecen belixerancia e agresións, alentadas por unha sociedade teocrática”.

Organizado en tres partes,  as dúas primeiras partes en verso e a última delas en prosa, a obra apresenta caracteres autobiográficos: en Merenda relata en forma de anuario experiencias escolares e adolescentes. En Efeméride en lascivia, convértese en amor xa adulto mentres que a última parte …En Frigorífico, en prosa, relata unha viaxe cega rodeada de amor na Habana.

Incluímos un dos poemas de Poéticaespectaculante:

Merenda

1988

Xurxo era tal un garbanfo

un carrifiño mouro bonitísimo

que me tiña preso polo peito

tan candidiño como era

e eu non atopei o xeito

e o guiar a un rego mollado

de paixón xuvenil e amor divagante

porque tamén eu era un mequetrefe

e só sabía do amor o que non sabía.

O amor verdadeiro, escóndese nos momentos que quedan no recordo? Ou en queles que dicidimos esquecer? Nada como unha reunión de ex-alumnos para que os vellos tempos veñan de novo.

Vellas paixóns:

A cantante Loretta “Rett” Jamison fixo unha existosa carreira con un repertorio repleto de baladas de amor e sensuais temas de jazz. Porén, o fracaso da súa relación co seu manager e amante Trisha York deixou un  crecente e enorme vacío no seu corazón. Trisna parece que encontra o que necesitada nos brazos de mulleres máis novas. Poderá Rett encontralo nos labios da compañeira de escola que lle ensinou por primeira vez o que era a paixón?

Vellos segredos:

A antiga capitana de animadoras, Cinny Keilor, é a típica rapaza de ouro americana… pero esconde un segredo que a consume por dentro. Tan loira e fermosa como antes, a alta e esbelta Cinny ten gañas de revivir os días idílicos de bailes e partidos. Pero, acaso esqueceu as cálidas noites que pasou no asento traseiro do coche con outra muller?

Vellas feridas:

A gañadora do Premio Nacional de Ciencias, a doutora Anjelica Martinetta, é unha das invitadas de honra do comité da reunión, polas súas vitorias na loita contra o cancro de ovarios. A que no seu día foi considerada unha forasteira volve para enfrentarse a un desafío diferente. Poderá gañar o corazón da muller pola que suspirou durante todos estes anos?

A autora, Karin Kallmaker publicou a novela na editorial Egales (Barcelona, 2009), e confesa que:

a primeira muller pola que perdeu a cabeza foi unha bibliotecaria. Só de pensar no lapis coa que apretaba o moño, tan atractivo, súbelle a temperatura.

 Tal vez foi pola influencia da bibliotecaria, pero o caso é que aos dezaseis anos, Karin caeu en brazos do seu primeiro e único amor”

Ian Gibson:  Caballo azul de mi locura, Lorca y el mundo gay (Planeta, 2009)

A búsqueda obsesiva do amor, habitualmente frustrada, é o tema fundamental en toda a obra de Federico García Lorca, desde as torrenciais prosas e poesías da adolescencia até La casa de Bernarda Alba. Só hoxe, despois de décadas de silencios cómplices e manipulacións, é posible afrontar con normalidade a relación desta temática co homoerotismo do poeta, para el dificilmente asumible nunha España machista e intolerante.

Neste libro o grande hispanista e reputado biógrafo de Lorca analiza con detalle os íntimos escritos xuvenís lorquianos, tan cheos de angustia sexual, e revela por primeira vez detalles dun traumático amor adolescente, deitando nova luz sobre o Lorca gay posterior, íntimo amigo de Salvador Dalí e Luis Buñuel que, contra todas as barreiras, intentou vivir e escribir con autenticidade. Por iso, entre outras razóns, foi asasinado en 1936. H oxe é un poeta mundialmente recoñecido e amado.

Ian Gibson (Dublín, 1939), é un dos hispanistas máis coñecidos e prestixiosos internacionalmente. Licenciado en Filosofía e Letras e doutor honoris causa polo Trinity College da súa cidade natal. Entre 1962 e 1975 foi profesor de literatura española nas universidades de Belfast e Londres e, a partir de 1975, abandona a docencia para dedicarse á escritura. Entre as súas bibliografías destacan outras obras sobre Lorca: Vida, pasión y muerte de Federico García Lorca e biografías de grande personaxes da cultura española: Dalí, Machado, Juan Ramón Jiménez… En 1984 nacionalizouse español, onde leva realiza unha intensa actividade xornalística, radiofónica e televisiva. Obtivo entre outros galardóns, o premio Espejo de España.

Happy Together (Hong Kong, 1997) de Wog Kar Wai. Intérpretes: Leslie Cheung, Tony Leung. (Sinopse dun dos filmes incluido no listado de filmes lgtb publicado nun post deste mesmo blog no pasado mes de xaneiro).

Baseado no relato The Buenos Aires affair de Manuel Puig (de quen xa falamos anteriormente).

Unha parella homosexual de Hong Kong viaxa á Arxentina atraída pola exuberancia das cataratas de Iguazú. No camiño discuten e ao chegar a Buenos Aires sepáranse, buscando cada un deles a maneira de sobrevivir  no complicado mundo gay dos barrios baixos. Son homes, son homosexuais, non se soportan. Non poden vivir separados.  Percorreron medio mundo, de Hong Kong a Buenos Aires, para volver a comezar.

Esta é a crónica dunha de tantas reunións e de un de tantos desencontros. É unha película sobre o amor e o desamor, de internos sentimentos e grandes emocións.

Wong Kar-Wai (Sanghai, 1958)

Nacido en Shanghai (1958), emigrou aos cinco anos a Hong Kong. Proveniente da China Continental e falando só mandarín e o dialecto shanghainés, pasou por un difícil periodo de adaptación ao cantonés que se fala en Hong Kong, polo que pasaría horas nos cines xunto a súa nai. Despois de se graduar na Universidade Politécnica de Hong Kong como deseñador gráfico en 1980,  fixo o Curso de Capacitación en Produción organizado pola Television Broadcasts Limited (TVB) de Hong Kong onde traballou como guionista de televisión. A mediados dos anos 80 traballou como guionista/director para The Wing Scope Co. e para In-gear Film Production Company,  produtoras do destacado actor/produtor Alan Tang. O estilo artístico e nostálxico de Wong tomou forma durante a súa aprendizaje con Alan Tang Kwong-Wing, quen invertiría na primeira película dirigida por Wong, As Tears Go By (1988). A carreira de Wong despegou cando dirixiu Days of Being Wild (1990), a pesar de perder millóns de dólares investidos por Alan Tang.

Filmografía

Artigo de Michelle D. Dartis, Escola de Biblioteconomía e Ciencias da  Información da Universidade de Indiana,  no boletín GLBTRT Newsletter, vol. 22, no. 1 (Primavera 2010) da American Library Association, do que ofrecemos un resumo coas cuestiósn principais.

Na primavera de 2010 Michelle D. Dartis realizou unha investigación sobre como se resolven nas BP as necesidades de información das persoas LGTBQ. Esta poboación vese frecuentemente pouco representada nas bibliotecas públicas. Sen embargo, como institución pública, debe representar a todos os membros da súa comunidade.

A literatura recente indica unha falta de materiais de información sobre as persoas que se identifican como gais, lesbianas, bisexuais, transxénero ou persoas que se cuestionan a súa sexualidade (LGBTQ), e o seu modo de vida. A partir de varios estudos e da revisión da literatura realizada polo autor, este identifica sete cuestións que representan unha oportunidade sen precedentes para que as bibliotecas e os bibliotecarios se introduzan nun territorio pouco coñecido e se convertan en apoio activo de persoas da comunidade LGBTQ.

Coleccións insuficientes e/ou desactualizadas
Os investigadores sinalan o problema crónico de coleccións obsoletas con información pouco actualizada. Estes libros tenden a atacar, condenar ou mesmo demonizar as persoas que aman outras persoas do mesmo sexo. Os bibliotecarios deben facer un esforzo consciente e sincero no proceso de selección para asegurar a adecuación dos materiais adquiridos para esta poboación.

Homofobia entre os traballadores da biblioteca
Os estudos demostran que a biblioteca é o lugar escollido por esta comunidade, en primeiro lugar, para buscar información sobre esta temática. Polo tanto, é necesario que os traballadores da biblioteca fomenten un ambiente acolledor para estas persoas.

Pouca visibilidade dos materiais LGBTQ
Algunhas bibliotecas esconden a propósito materiais que teñen que ver co amor ou co sexo e especificamente materiais sobre persoas de diferente orientación sexual.

Heterosexismo
A presunción de heterosexualidade é a norma. A Biblioteca ten o deber de proporcionar servizos para as persoas sen ter en conta a súa orientación sexual, xénero, identidade sexual…

“Xenerismo”
A difusión do “xenerismo” ten un efecto moi negativo sobre os que están en busca da súa identidade, auto-descubrimento ou definición de quen son ou pretenden ser na súa vida.

Censura
O uso da auto-censura foi ben documentado entre algúns bibliotecarios. O proceso de selección pode empregarse como unha forma de reducir malentendidos, medias verdades e mitos que rodean a comunidade LGBTQ

Vergoña e/ou acoso
Moitas veces, os usuarios LGBTQ das bibliotecas teñen medo ou vergoña de pedir axuda por medo a seren perseguidos, ridiculizados ou envergoñados. Isto non debería suceder. A principal razón de existir das bibliotecas públicas é proporcionar materiais e servizos para todas as persoas que residen nas súas comunidades. Ademais, as bibliotecas son moitas veces o lugar ao que as persoas LGBTQ recorren por non teren alguén en quen confiar.

Na promoción dunha relación positiva coas persoas desta comunidade os bibliotecarios poden colaborar coas entidades LGBTQ do seu entorno. Crear exposicións aproveitando o período do orgullo gai. Asegurar que a súa colección inclúe materias representativos destas persoas e contribuír a destruir os mitos e equívocos que existen en torno dos individuos LGTBQ e o seu “seu estilo de vida”.